Ավելի քան երեք հազար հոգի մասնակցել է հարցմանը, որը բացահայտում է Երևանի հասարակական տրանպորտի վերաբերյալ առկա հիմնական գերխնդիրները: Հարցման յուրաքանչյուր երրորդ մասնակից պատրաստ է վճարել ավելին կատարելագործված ծառայության համար: Եթե խոսենք թվերով, ապա հարկ է նշել, որ մասնակիցների 16%-ը ընդունում է ուղեվարձի աճը կիսով չափ, իսկ 14%-ը՝ նույնիսկ կրկնակի: «Համաձայն մեր հարցմանը՝ մարդիկ պատրաստ են աջակցել կառավարությանը հասարակական տրանսպորտի ծառայությունները բարելավելու գործում, նույնիսկ եթե ուղեվարձը բարձրանա: Բարեկեցիկ հասարակական տրանսպորտի առկայությունը արդեն նպաստում է շրջակա միջավայրի առողջացմանը և տնտեսական աճին: Ժամանակակից եվրոպական քաղաքներում հասարակական տրանսպորտին իրենց զարգացման ծրագրերում ամենամեծ առաջնահերթությունն է տրվում»,- ասում է ուղևորությունների օնլայն պլանավորման համակարգ Transport for Armenia-ի հիմնադիր Պատրիկ Լուչանը:

Հարցմանը Երևան քաղաքի ուղևորները պետք է պատասխանեին, թե որոնք են հասարակական տրանսպորտի երեք գերխնդիրները: Հարցման մասնակիցների 43 %-ը պատասխանել է, որ շաբաթը մի քանի անգամ օգտվում են տաքսիներից, որովհետև ավտոբուսները և միկրոավտոբուսները բավարար չափով չեն աշխատում: Ահա թե ինչու հարցման մասնակիցների մեծամասնությունը պատրաստակամ է վճարել ավելի բարձր ուղեվարձ բարելաված հասարակական տրանսպորտի համար:

Հարցվողների 77%-ի կողմից ճանաչված գերխնդիրը փոխադրամիջոցների ցածր հզորությունն է: Մինչ մյուս եվրոպական քաղաքները լի են հսկայական ավտոբուսներով և տրամվայներով, Երևանը դեռ կախված է տեխնիկապես հնացած միջին չափսի ավտոբուսներից, որոնք կարող են փոխադրել մինչև 40 ուղևոր: Որպես համեմատություն օրինակ կարող է հանդիսանալ Թբիլիսին, որը սպասարկում են 82 ուղևոր փոխադրող մեծ ավտոբուսները:

Յուրաքանչյուր երրորդ անձ կարծում է, որ վարորդները չպետք է ծխեն և հեռախոսով զրուցեն վարելու ընթացքում: «Երևանի վարորդները ավելի շատ են զբաղված հեռախոսազանգերին պատասխանելով, քան զանգերի կենտրոնի օպերատորները: Եթե հեռախոսազանգեր չեն կատարում, ապա մեկը կյուսի հետևից ծխախոտ են ծխում անմիջապես «Չծխե՛լ» նշանի ներքո, և ոչ ոք չի բողոքում»,- ասում է Գերմանիայից ժամանած զբոսաշրջիկ Վանդան:

Հարցվողների ավելի քան 30%-ը բարձրաձայնում է գիշերային ժամերին ծառայության բացակայությունը: Երեկոյան 11:30-ից մինչև առավոտյան 6:30 ընկած ժամանակահատվածը տաքսիից բացի այլընտրանք չկա: Բրատիսլավայի նման քաղաքը, որն ունի Երևանի բնակչության քանակի կեսը, դեռևս 12 տարի առաջ ներմուծել է գիշերային ավտոբուսային սպասարկման ծառայությունը: Կեսգիշերից մինչև առավոտյան ժամը 4-ը ընկած ժամանակահատվածում ավտոբուսները յուրաքանչյուր ժամը մեկ մարդկանց փոխադրում են քաղաքի կենտրոնից: Քաղաքն օգնում է մարդկանց ցածր ուղեվարձով ցանկացած ժամանակ ճանապարհորդել՝ այդպիսով նվազեցնելով կախվածությունը մասնավոր մեքենաներից և տաքսիներից:

Հարցվողների մոտավորապես 18%-ը չունի տեղեկատվություն ավտոբուսային գծերի, չվացուցակների և ուղեվարձերի վերաբերյալ: «Մենք հավատում ենք, որ իրականացնում ենք լավ հասարակական ծառայություն ուղևորների և արտասահմանցի զբոսաշրջիկների համար: Այժմ, երբ ավտոբուսների և գնացքների ժամանակացույցերը հրապարակվել են Transport for Armenia կայքում, հասարակական տրանսպորտը դարձել է թափանցիկ և այժմ դյուրին է օգտվել դրանից: Ահա թե ինչպես ենք մենք նպաստել Հայաստանում դրական փոփոխություններին»,- ասում է Պատրիկ Լուչանը:

Լավ կառավարում ունեցող քաղաքներում ավտոբուսային կանգառներում ավտոմեքենա կայանելը խստորեն արգելված է և վերահսկվում է ոստիկանության կողմից: Չնայած Երևան քաղաքը ևս ունի նմանատիպ օրենսդրական կարգավորումներ, շատ տաքսու վարորդներ արհամարհում են այս օրենքները: «Մենք ստիպված ենք կենգուրուների նման ցատկոտել տաքսիների վրաներով: Ավելին՝ ավտոբուսները կանգնում են ուղիղ խիտ երթևեկությամբ փողոցների մեջտեղում»,- ասում է Ռուբենը՝ ուղևոր, որը ամեն օր Ֆրանսիայի հրապարակից Նոր Նորք է մեկնում և հակառակը: Նա հանդիսանում է հարցվողների այն 17%-ի ներկայացուցիչը, ովքեր կարծում են, որ ավտոբուսի կանգառներում ապօրինի կայանումը բարդացնում է և վտանգավոր դարձնում ավտոբուս նստելու պրոցեսը: Օրինախախտ մարդիկ պետք է անպայման տուգանվեն ոստիկանության կողմից:

Հարցումը իրականացվել է Transport for Armenia-ի կողմից անցյալ տարի ապրիլին: Ավելի քան 3500 հոգի Երևանից մասնակցել են հարցմանը:

Transport for Armenia-ն Հայաստանի հասարակական տրանսպորտի ուղևորությունների առաջին օնլայն պլանավորող համակարգն է: «Տրանսպորտային համակարգը քաոսային է թվում առանց երթուղիների և չվացուցակների մասին տեղեկատվությունը տիրապետելու: Մենք գիտենք, որ դեռևս առկա են մարտահրավերներ: Մեր օնլայն գործիքը օգնում է հեշտորեն օգտվել հասարակական տրանսպորտից, որի շնորհիվ մոտենում ենք միջազգային չափանիշներին», -ասում է Պատրիկ Լուչանը՝ ձեռնարկատեր Սլովակիայից, ով Հայաստանում այս ստարտափն է համակարգում:

Ուղևորությունների պլանավորման համակարգը գործում է երեք լեզուներով՝ հայերեն, անգլերեն և ռուսերեն: Այն անվճար է և յուրաքանչյուրը կարող է այցելել կայքը http://t-armenia.com: